عَ ضهور هََ السطيحات
عيون الناس سارحة بالسما
بتغربل الغيمات
وبتفلّي خروم الفضا
بارمي عَ وجّ هلال
بعدو يا دوبْ خيال
جايي ومدري منين
وجايب معو مِرسال
واصل دغوش الغياب
يا دوبو عمرو نهار
مشتاق لَ هالأحباب
معبّي جيابو خبار
مخبّي بعبّو العيد
شهر عَ أمّو جديد
جايب بِ هالصرّة
فطورات وسحورات
ومع صوت الأدان
بتعلى التكبيرات
جايي الصبح رمضان
وجايب معو الخيرات
وقبل الأدان بشوي
منلعب بِ هالساحة
منكرّج دواليب
وبالبال شربة مي
بيوصل الغمّوزي (1)
وعَ الكتف بارودي
ومع صوت الأدان
طلقة نار بتودّي
منفطر عَ طاب راحة
منقرش التفاحة
وبوجّنا عَ البيوت
قبل الصلا ما تفوت
من هون قمر الدين
ومن هون شراب التوت
شوربا وفتّوش
والطحشي على اليخنات
منعزم عَ فطورنا الخالات
وبتطول هالسهرات
سوالف، قصص وحكايات
برجيس، غلوبات ونكايات
بيمرق هَـ المسحّر
مع طبلتو مبكر
قوم يا صايم
قوم وحّد الدايم
قوموا على سحوركن
رمضان جايي يزوركن
منشغّل الببّور
منلقّم (2) الإبريق...ومننطر الشاي يفور
يا خطيّت الصايم
بيناجي هَـ الدايم
بيتمتم تواشيح
وبيصلّي التروايح
ت يشوف ليلة القدر
"خير من ألف شهر "
والناس قبل نومن
بيحلموا...بِ طول العمر
وبليلة الوقفي
بتشوف ألف شوفي
وبالسوق عجقة ناس
حاملين كياس كياس
وعَ بواب هَـ الفران
معمْشق رغيف رمضان
حبّة البركة عَ وجّو غمّيزات
طفل زغير عمْ يضحك وفرحان
صدور نحاس ببيت النار
والناطرين كتار
قراص مرنّخة بميّة زهر
بتفرفح بعلبك عَ طول الشهر
عَجْن الصبايا بالسكّر المحلول
مدعوك بيديهن، بالعسل مجبول
قمار حلوّي زغيّرة وبالصدر مقمرّة
بالجوز والعجوي...بالوشم مغندرة
وعَ صواني العيد
هَـ القراص مصمودي
وبالعرض والطول
مبروز هَـ المعمول
ريحة المسك والعنبر
بترافقَك للبيت
مدَخلشي بِ هالزواريب
وبتفوع على السكّيت
وبيثبتوا هالعيد
تجويد وأناشيد
وبيهوبروا لْولاد بالحارة
عَ بكرا عيد جديد
بكرا العيد ومنعيّد
مندبح بقرة السيّد
قميص جديد ناطر عَ المخدّي
وصبّاط عمْ يلمع غفي حدّي
منقوم من بكّير
قبل الحمام مَ يطير
تَ ناخد العيديي
ونحوّش فرنكات
---------------------
محمد حمود
1 الغمّوزي: شاب بعلبكي مكلّف بإعلان الإفطار يوميا بعد الأذان بواسطة بندقية صيد
2 منلقم : وضع الشاي في الإبريق عندما يغلي الماء