مين بيتذكّر الكندرجي، المبيّض، المجلّخ، المنجّد (ندف القطن والصوف)، مصلِّح بوابير الكاز، طنبر الكاز (صوت بوقه الشهير)، العتّال (تعا يا سَلّ)، المصوِّر الأرمني، صندوق العجايب (تعا تفرّج يا سلام)، بيّاع الجرايد؟
مين بيتذكّر بيّاع الخضار والفواكه (صابيع الببو يا خيار)، بيّاع البطيخ (عالسّكين يا بطيخ، بقلاوة يا بطيخ، عدلوني يا بطيخ)، بيّاع السردين، بيّاعة الزعتر الأخضر والخبّيزة، بيّاع العُوجا والتوت والأكي دنيا والجنارك، بيّاع التين، بيّاع الجوز، بيّاع الجمّيز، بيّاع الصُبّير، بيّاع الرمان (يطفّي نار العطشان)؟
مين بيتذكّر بيّاع الفستق (بالقرطاس الورقي، والداخون)، بيّاع الكستنا المشويّة، بيّاع الحمُّص المسلوق (بليلة بلبَلوكِ)، بيّاع الكبيس والمخللات (وخاصة في العيد)، بيّاع الترمس، بيّاع إم قليبانة (خضرة ومليانة)، بيّاع عرانيس الذرة المشوية والمسلوقة، بيّاع الكعك والقلّيطة؟
مين بيتذكّر بيّاع السوس (العرقسوس)، بيّاع الليموناضة، بيّاع القهوة، بيّاع الفريسكو (الثلج المبروش الملوّن... تعا بَورِد)، بيّاع اللبن العيران واللبن مع توم، بيّاع الكازوز (جلول، إيديال، كندا دراي)، بيّاع ألواح الثلج؟
مين بيتذكّر بيّاع الكرابيج (برمي الزهر)، بيّاع النمّورة، بيّاع البندْقيّة، بيّاع التفاح المْعلّل الأحمر، بيّاع غزل البنات، بيّاع الشعيبيّات (كبِّر الجاطات لنكتّر القطرات)، بيّاع البرازق، بيّاع البريوش، بيّاع القضامي النعّومة (بالقرطاس الورقي)؟
مين بيتذكّر بيّاع دواليب الهوا (عصفورك طَيَّر يا زغَيّر)، بيّاع البالونات، بيّاع الطائرات الورقيّة، بيّاع الصيصان الملوّنة، بيّاع الورد والغاردينيا والياسمين، بيّاع الأقمشة والشراشف والمناشف، بيّاع الكلسات، بيّاع الصحون والكبّايات (معانا صحون معانا كبّايات معانا فناجين قهوة)، بيّاع الطبلة الصغيرة (نفرك عصاها الطويلة بين اليدين فتصدر الأصوات بسبب ارتطام الخرز الملوّن بجدار الطبلة)، بيّاع العُتَق؟
مين بيتذكّر؟...