تقدم الزمن وهي في مكانها راوح …
حاملة .. ورامية ..
والزمن في الانتظار
دق الباب على السكيت ..
رمت الهواء ومسكت الريح
لفحتها تقلبات المشاعر
حددي شو بدك
تفاؤل ام تأرجح
فالتشاؤم ليس وقته ..
شو بدها تجاوب وبماذا ستجيب ..
ومصايب البلد ناطرة بطابق علوي
ببناية.. بيوم عيد ..
قبل الفجر// والناس نيام ..
وسماء البلد مستباحة ..
ناقص .. زايد مش مهم
المهم تصريح هارب
تصريح ممسوك
وما حدا برجع الامان إلا رب
الامان …
بتخلص الكتابة وما بتخلص مصايب
البلد ..
وشو فينا نعمل لبلد منقوص
السيادة في الداخل والخارج
مهدد من الخارج والداخل ..
والشعب البعض يعتبره زوار
والبعض يختصره ببقعة ..
ويا فلتان موج ناطر زمور ..
وجدي و…جدك .. رحلوا وتركوا
البلد هيك وبعده على حطة إيدهم
شوية فلتان ..
زيادة فساد
حرب عبثية شوارعية
سلاح فردي متفلت
سلاح ثقيل بالجرود …
ما مهم ..
المهم البلد ماشي
والحكومة حكومة إنقاذ عفواً
اصلاح …
وسلام اجى بوقت الحرب …
والشعب منوم بكذبة وراء كذبة
ابتسامة الصبح …
والتفاؤل اخلاق
تمحيها تعاسة ساعات النهار
تمشي يمشي معك كل البلد
وشو ناطرك ما حدا بيعرف ..
والكل ناطر
ناطر حاكم يعيد الاموال ..والأمنيات بعيدة ..
والوزير يقول ما حدا يحلم ياخد
مئة الف دولار … وانسى العملة
الوطنية فهي في المهوار
الوزير يقول ما في حدا بيقدر يخبيها بالبيت..
زعل الحرامي وانبسطوا السراقين …
لمن يريد ..له مئة الف دولار
..انما يأخذها عند الحاجة جزء وليس الكل ..
مستشفى او سفر ..او تعليم اولاد
في الخارج ..
نسي يقول اكتئاب ..
او حدا بدو يهرب او يفل بهدوء
ويترك البلد …
وما يترك شقى العمر ..
ويترك نقزات العمر ..
يا بلد قل لي متى استراحة
الإنقاذ
متى يأتي رجل مسؤول
ينقذ البلد ..
ومن ينقذ المسؤول من فساد
استوطن …
وماج ..
يموج العمر في لحظات هنية ..
لحظات مسروقة مضاءة
بالإحساس
يموج العمر بالابتعاد
يموج العمر بالنظرات ..
واسندني لاسندك والحيط مائل
والخيط مهترىء ..
اعطانا الزمن فرصة …
ويا خوفي نتعود على يلي عم يصير
ضحكت ذاتها معقول بعد ما تعودت ..
ربما العقل يحمي حاله بمحي
الاحداث
يغربل المجريات ..
يتخلى الاحساس عن غرابة الأشياء
فيتقوقع داخل ذاته ..
حتى الاحساس مقسوم ومقسم
وليس فقط البلد …
يمكن بكرا
يمكن اليوم
يمكن مبارحة
يمكن قبل وجود اجدادنا ..
ستبقى الكلمات تحارب
وستبقى الأحرف تتخبط
وستبقى الريح تفتح الابواب
وسيبقى القرار ليس لنا
يمكن اليوم اصعب …
يمكن الأمور تصبح مكشوفة
يمكن نضع ماكياج للاهتراء
وتفوح روائح الفساد
يمكن يرجع الحق لصحابه
ويمكن صاحب الحق يطلع هو
الغلطان ..
يمكن الكهرباء ترجع عادي
وينقهر اصحاب المولدات ..
لخسارة مورد رزقهم
يمكن الحنفية تضحك لماء الدولة
يمكن نكزدر بكل المناطق بدون
خوف وبامان ..
يمكن نلجأ للذكاء الاصطناعي
ونفكر بدل اصحاب القرار
يمكن والله اعلم
نفرح كما كل البشر
بدون ما نشيل هم …
يمكن لا اعود اكتب عن زنقة
البلد
وتلبك الحكومة ..
يمكن وقف كتابة ..
واترك الاحساس يكزدر داخل
شرايين القلب ..
وأمسك موج البحر
فتموج المشاعر ..
ما حدا بيعرف
فقط الكلمات ترسم الطريق
ربما تضع نقطة على السطر …
فتسقط زاوية كل سبت ..
ويبقى البلد يتفركش
…
ربما وربما ..
انما الاكيد
ان الشعب بدو دولة
والدولة بدها وطن …