شو بعد فيكي تحملي يا مْشَحّرة!
قاعد «هَلي» ع الأرض
مش عارف
إذا هالأرض بعدا مدوّرة
و«عاصي» انْفَجَر راسو
بعِد كمشة سنين
هوّي ويشتغل
تا تطلَعي متل القمر
ويفَتِّح بصَوتك بْواب مسَكّرة
.. وماتت «لَيال» رفيقتِك!
مِدري غِفِت عا مَهْلها
مِدري الصّبيّة شافت جناحاتها
من قبل ما تِكبَر، غصون مْكَسّرة؟
وهلّق «زياد»
اللي إجَا خَرْبَط قوانين الخَيَال
وفَكفَك الواقع
كأنو مْنِ السّما واقع
وفرجانا حقيقة حالْنا
نكتة.. وطوايف مَسْخَرة!
بِقْيِت معِك «ريما»
حرَس
رافع بإيدو مَسْطَرة..
شِفتو،
انْصلَب مرّة يسوع
وتارْكِك فوق الصليب مْسَمَّرة؟
هيك القَدَر؟
صِرتي على التسعين
وِسْنينِك بقِتْ
غابة جْروح مْنِ المَضَى
وِجْروح مِخْفيّة بقلب.. المَحْبَرة
حَقِّك تقولي: بَس!
حتّى لو سكَن فيكي جبَل صوّان
عا هيئة مرَا!