المهندسة سناء السيروان
تعدّدت الأمثال اللبنانية التي تحدّثت عن المناخ وتنوّعت سواء تبعا لأشهر السنة الميلادية، أو للأيام ذات الطابع الديني أو تلك التي تتناول أحوالا خاصة بالطقس.
على سبيل المثال:
أ- الأمثال المتعلقة بالأشهر:
{ كانون الثاني:
• بكانون كن ببيتك وكثّر من حطبك وزيتك.
• في كانون كن وع الفقير حن.
• كانون الأجرد خلاَ الشجر أمرد.
• بعد كانون الشتا بيهون.
• بكانون الثاني الأصم، قعود (إقعد) ببيتك وإنطم (تخبأ).
{ شباط:
• شباط اللبّاط.
• شباط وعالو (أوعى له) ما يغرّك اعتدالو.
• شباط: غيمو وهواه أحسن من شمسو وشتاه.
• شباط لو شبط ولو لبط، ريحة (رائحة) الصيف فيه.
• بشباط ما تطلع من البيت وكتّر طحين ودبس وزيت.
{ آذار:
• آذار الهدّار فيه الصواعق والأمطار.
• خبّي فحماتك الكبار لأول عشرة من آذار.
• شهر آذار ساعة شميسة وساعة أمطار.
• برد آذار بقص المسمار.
• بآذار طلّع بقراتك من الدار.
{ نيسان:
• ميّة نيسان بتحيي الإنسان.
• بنيسان بتصير الدني عروس، وبيخففوا الغطا والملبوس.
• نيسان بلا شتيْ متل عروس بلا جليْ.
• بنيسان طفّي نارك، وإفتح باب دارك.
• بنيسان بيدوب التلج وبيبان المرج.
{ أيّار:
• المطرة بأيَار بتموِن الفلاح وبقراتو، وبتجوِز ولادو وبنيَاتو.
• برد أيار، خرَاب الديار.
• بعشرة أيَار إحمل منجلك وإندار (در).
• بأيار نام ع سطح الدار.
• أيار: ضهر بقراتك ع الدار.
{ حزيران:
• حزيران شهر البسط والكيف: أوَلو( أوَله) ربيع وآخرو (آخره) صيف.
• بحزيران بتشعل النيران.
• بحزيران بيطلع موسم الحرير.
• تعبك ع صوص حزيران ما بيروح ضيعان (لا يضيع).
• حر حزيران بيعمل الحليب عيران.
{ تموز:
• بتموز بتغلي المي (الماء) بالكوز.
• الجحاش البيض ما بتدفا إلّا بعشرين تموز.
• بتمُوز بتدفي العجوز.
• بتموز كنوز مياتك لتعوز.
• بتموز بيلوّح العنب وبينشف اللوز.
• بتموز اقطف الكوز.
{ آب:
• آب للهّاب.
• آب طبّاخ العنب والتين.
• جدّي خبَرني عن جدّ وأب: «كل الشهور بتشتي ما عدا شهر آب».
• بعشرين آب، دخول (إدخل) الكرم ولا تهاب.
• اللي ما درَى بآب شحم قلبو داب (ذاب).
{ أيلول:
• أيلول طرفو بالشتا مبلول.
• بأيلول دبِر المكيول للعدس والحمُص والفول.
• بأيلول تموَن لعيالك، وشيل الهمّ عن بالك.
• بأيلول بيطي الزيت من الزيتون.
• بأيلول تمون لعيالك وشيل الهمّ عن بالك.
{ تشرين الأول وتشرين الثاني:
• اللي ما شبع من العنب والتين بيشبع من ميّة تشرين.
• برد تشارين أحد من السكاكين.
• برد تشارين بيخزّق المصارين.
• بين تشرين وتشرين صيف ثاني.
• تشرين الكيف أولو شتي وآخرو صيف.
{ كانون الأول:
• نصبة كانون الأول خير من نصبة عملوَل (عم أوَل).
ثانياً: الأمثال المشتركة بين الأشهر:
• راح العاقل كانون وإجا شباط المجنون.
• بين كانون وشباط عند جارك لا تبات.
• إمشي ع غيم كانون، وما تمشي ع غيم شباط.
• راح شباط الهدّار وإجا (جاء) آذار الغدَار.
• شو شباط قال لآدار (لآذار): «أربعة منك وتلاتة (ثلاثة) مني مناخد (نأخذ = نميت) العجوز وزوجها».
• بين شباط وآذار بيفضوا الجرار.
• كل رعدة بآذار مطرة بنيسان.
• آذار حبل ونيسان سبل.
• حشيش آذار للشطار وحشيش نيسان للكسلان.
• يا آدار يا أبن عمي: أربعة منك وثلاثة منِي، تا نخلِي العجوز تحرق منجلها وتغنِي.
• نيسان حبل ونوَار( أيَار) سبل.
• ما بين تشرين الأول وتشرين الثاني صيف ثاني.
• ما في أنقى من قمرة تشرين، ولا أظلم من عتمة كانون.
ثالثاً: الأمثال المتعلقة بالمواقيت الدينية:
• بعيد مار إلياس (20 تموز) حط العنب للجلاَس (للزوار).
• عيد التجلِّي (6 آب)، بيقول للصيف ولِي( إرحل).
• بعد عيد الصليب (14 أيلول)، كل أخضر بيْسيْب.
• إذا صلّبت خرّبت.
• بعيد البربارة (4 كانون الأول)، بتطلع المي (الماء) من وكر الفأرة.
• من المولود (الميلاد) للمعمود، بتوقف المي عامود.
• لا تسافر يا هادي بين الغطاس والميلادي.
• لا تقول: خلصت الشتويِة حتى تخلص المستقرضات المنكيِة.
• بالمستقرضات عند جارك لا تبات.
• ما لك طرش يقوم، ولا مركب يعوم، إلاَ بعد مستقرضات الروم.
رابعاً: الأمثال ذات المدلول:
• حر الصيف ولا برد الشتي.
• الدفا عفا (عافية) ولو بعز دين (منتصف) الصيف.
• دخان يعمي ولا برد يضني.
• السما، ان احمرت ع باكر احمل عصاك وسافر؛ وإن احمرت من عشية فتش عن مغارة دفية.
• سحابة صيف ومرّت.
• سحابة صيف تذروها الريح.
• الشتي ضيق ولو تلتينو (2/3) فرج.
• الشتي فرج ولو تلتينو (2/3) ضيق.
• لما بتصير (تصير) ورقة التينة قد دعسة البطة نام وما تتغطّى.
• لو بدها تشتي، كانت غيَّمت.
• متى تلجت (أثلجت) فرجت.
• برد الخريف توقَاه (توقَى منه)، وبرد الربيع تلقَاه.
• ايمتى (متى) كنا والبرد يلسعنا.
• كل ساعة برأي متل غيمة شباط.
• شباط عدو العجائز.
• شباط ما عليه رباط.
• شباط ما على كلامو رباط.#
• متل شباط بيعير وبيستعير وبيضل ناقص.
• لله ينجينا من ثلج نيسان وكيد النسوان.
• بنيسان الحكم للنسوان.
وفي نهاية المشوار مع الحكم والأسرار، يفرض نفسه سؤال عن مدى تطابق هذه الأمثال أو بعضها مع التغيّر المناخي الواضح بزيادة حرارة الأرض وذوبان الثلوج في القطبين وارتفاع منسوب البحار وظاهرة التسونامي وغيرها؟ وهل نحن بحاجة إلى تحديث لهذه الأمثال؟